Á eigin vegum. Ljósmyndir 1967–2017

aa

Á eigin vegum. Ljósmyndir 1967–2017 í Myndasal Þjóðminjasafnsins.

Á eigin vegum. Ljósmyndir 1967–2017 er úrval persónulegra verka Guðmundar Ingólfssonar og veitir hún yfirlit yfir um hálfrar aldar ljósmyndaferil hans. Guðmundur er meðal fremstu ljósmyndara sinnar kynslóðar á Íslandi og hefur  hann alla tíð unnið á eigin vegum, samhliða verkefnum unnum eftir beiðni og rekstri ljósmyndastofu.  Viðfangsefni Guðmundar hafa verið fjölbreytt og hefur hann ljósmyndað bæði  landslag og byggð. Í Reykjavík hefur hann skrásett ásýnd borgarinnar og í myndum teknum í úthverfum og í Kvosinni – af sjoppum og af mannlífi – birtast breytingar sem sýna þróun byggðar.  Þessi persónulegu verk hefur hann gjarnan myndað á stórar filmur.

Í texta til kynningar sýningunni í Þjóðminjasafninu segir “Guðmundur er fæddur árið 1946. Hann lærði ljósmyndun í Folkwang Schule für Gestaltung, hjá Otto Steinert í Essen í Þýskalandi á árunum 1968–1971. Þar þróaði hann myndsýn sem var byggð á hugmyndum um nýja hlutlægni í ljósmyndun. Að námi loknu fluttist Guðmundur til Reykjavíkur og stofnaði þar ljósmyndastofuna Ímynd. Á stofunni voru sett ný viðmið í fagmennsku í auglýsinga- og iðnaðarljósmyndun á Íslandi.

Sýningarstjóri er prófessor Timm Rautert.

Í tilefni sýningarinnar gefur Þjóðminjasafn Íslands  út bók með ljósmyndum Guðmundar og greinum sem fjalla um feril hans. Greinahöfundar eru Einar Falur Ingólfsson, Jacob Lillemose, Liv Gudmundson og Timm Rautert. Ritstjóri er Ingunn Jónsdóttir.“ Nánar má lesa um sýninguna á vef Þjóðminjasafns Íslands.

Sýningin verður opnuð 23. september 2017 og stendur til 14. janúar 2018.

/sr.