Hrafna Jóna sýnir Nocturne í Skotinu

aa

Hrafna Jóna Ágústsdóttir

Nocturne

Hrafna Jóna Ágústsdóttir sýnir nú myndaröð sína Nocturne í Skotinu í Ljósmyndasafni Reykjavíkur og stendur sýningin til 1. febrúar 2021.

Hrafna Jóna útskrifaðist frá Ljósmyndaskólanum í janúar 2020 og hefur síðan þá unnið að list sinni.

Um verkin á þessari sýningu segir Hrafna:

„Ég er náttfari og hef alltaf verið, ég er á heimavelli í rökkrinu, sköpunarkraftur minn nærist á myrkrinu og ég lifna við. Nóttin er förunautur dagsins, hún breytir heiminum og gerir hann minni, kannski einfaldari. Allt er hljótt, fáir eru á ferli nema kettir og einstaka náttuglur. Myrkrið er mjúkt, myrkrið er spennandi, það er kalt, hlýtt eða óttablandið. Myrkrið breytir götunum í upplýsta árfarvegi sem renna fram hjá trjám sem varpa dulúðlegum skuggum inn í garðana. Myrkrið dregur fram og ýkir upp það sem við sjáum ekki með eigin augum, öll skúmaskotin, alla skuggana. Svo er einn og einn gluggi upplýstur, ég vil komast að leyndarmálunum sem þar búa að baki. Hver er vakandi? Af hverju? Hvað á sér stað á bak við gluggatjöldin?“

/sr.