Ljósmyndir Ingu Lísu Middleton og Björns Björnssonar í Þjóðminjasafni.

aa

 

Nú standa yfir tvær ólíkar ljósmyndasýningar í Þjóðminjasafninu en það eru sýningar á myndum  Ingu Lísu Middleton og sýning á úrvali af verkum Björns Björnssonar.  Báðar sýningarnar standa til 17. september 2017.

Björn Björnsson (1889 – 1977) var áhugaljósmyndari sem sérhæfði sig að mestu leyti í fuglaljósmyndun. Hann vann að ljósmyndun á Austfjörðum meðfram verslunarstörfum, lengst af á Norðfirði. Á síðari árum tók Björn  einkumnáttúrulífsljósmyndir og ferðaðist um landið í þeim tilgangi. Myndir hans af fuglum birtust víða, meðal annars í Náttúrufræðingnum og í British Birds. Sýningin er í Myndasal Þjóðminjasafnsins.

Inga Lísa Middleton er ljósmyndari að mennt, búsett í Bretlandi.Inga Lísa Middleton er með BA gráðu í ljósmyndun frá University for the Creative Arts í Surrey og MA gráðu í ljósmyndun frá The Royal College of Art í London. Hún hefur tekið ljósmyndir fyrir auglýsingar og tímarit, myndskreytt bækur, unnið sem ljósmyndari í bíómyndum og tekið portrett ljósmyndir. Inga Lísa hefur einnig skrifað, leikstýrt og framleitt sjónvarpsþætti, stuttmyndir, auglýsingar og myndbönd.

Titlill sýningar hennar er Hugsað heim  og vísar hann hvorutveggja  til viðfangsefnis myndanna og þess draumkennda blæs sem einkennir þær. Meginstef sýningarinnar er heimþrá en myndirnar sýna tilfinningatengsl höfundar við heimalandið Ísland og eru fullar af ljúfsárum söknuði. Myndefnið er bæði áþreifanlegt og táknrænt í senn: Kröftugir fossar sem knýja vatnsaflsvirkjanir, lóan sem boðar komu vorsins eftir langan vetur og hvönn sem löngum hefur verið notuð sem lækningajurt. Í myndunum kallast hið hversdagslega á við ljóðræna sýn á landið.

Inga Lísa vinnur myndirnar sínar með aðferð sem nefnist á ensku Cyanotype og gefur hún myndunum einkennandi bláan lit. Aðferðin var þróuð á 19. öld og var lengi vel notuð til að fjölfalda prentefni. Heitið vísar til bláa litarins, cyan sem er einkennandi fyrir myndirnar.  Sýning Ingu Lísu er á Vegg Þjóðminjasafns Íslands.

Nánar má lesa um sýningarnar og listamennina á vef Þjóðminjasafnsins.

/sr.