Þorsteinn Cameron sýnir í Ramskram

aa

Þann 2. júní kl. 17.00, opnar Þorsteinn Cameron sýninguna Línur fyrir lönd  í RAMskram á Njálsgötu 49 en Þorsteinn hlaut fyrr á þessu ári styrk úr Minningarsjóði Magnúsar Ólafssonar ljósmyndara (1862-1937). https://reykjavik.is/frettir/vinningshafi-ljosmyndaryni-ljosmyndasafns-reykjavikur  Jafnframt sýningaropnun kemur út bók með sama titli.

Þorsteinn segir um verkefnið:

Lines for these lands / Línur fyrir lönd er afrakstur verkefnis sem ég vann sumarið 2017. Eftir að hafa starfað víðsvegar á jöklum landsins undanfarin ár sem leiðsögumaður langaði mig til að gera þeim skil á nýjan máta. Ég slóst því í för með meðlimum Jöklarannsóknarfélags Íslands í mælingarferðir á Langjökul og Vatnajökul. Jöklar eru á hverfanda hveli og því vinna vísindamenn og sjálfboðaliðar hörðum höndum við það að skrásetja og rannsaka jökla enda er enn margt óljóst um eðli þeirra.

Titill verksins vísar í þá tilhneigingu mannsins að kortleggja og túlka náttúruna. Fyrr á tímum voru óhljóð og hreyfingar jökla útskýrðar með hinum ýmsu furðusögum en nú á tímum upplýsinga og tækni þá höfum við skipt út tröllasögum og hjátrú fyrir mælingar og líkön. Í myndunum mínum reyni ég að varpa ljósi á það vandasama ferli að gefa náttúrunni merkingu og að skapa þekkingu í beinum og óbeinum átökum við landslagið.

Ljósmyndirnar skrásetja starf nútíma landkönnuða, aðferðir þeirra, tækni og samfélag. Í höndum vísindanna umbreytist hvít auðn jökulsins í rannsóknarstofu þar sem allt er kyrfilega kortlagt, vigtað og mælt. Þessi þrotlausa handavinna er unnin í nánu og einlægu samstarfi mælitækja og manna. Skilningur okkar á hinum náttúrulega heimi er því samstíga tækniþróun. Mælitækin eru eins og framlenging á skynfærum vísindamanna og leika lykilhlutverk í þekkingu okkar á umheiminum.

 

Lines for these lands / Línur fyrir lönd er fyrsta einkasýning Þorsteins á Íslandi en hann útskrifaðist með BA gráðu í ljósmyndun frá London College of Communicatons árið 2014. Síðan þá hefur hann unnið sem fjalla- og jöklaleiðsögumaður hjá Íslenskum Fjallaleiðsögumönnum. Í febrúar hóf hann MA nám í ljósmyndun við Photography Studies College í Melbourne, Ástralíu. Verkefnið verður einnig hluti af samsýningunni Archeology for the Anthropocene í Verksmiðjunni á Hjalteyri frá 17.06.-22.07.

 Nánar má sjá um Þorstein og verk hans hér: http://www.thorsteinncameron.com
Sýning Þorsteins  í RAMskram stendur til 8. júlí og opið er laugardaga og sunnudaga frá 14.00 – 17.00.
RAMskram er sjálfstætt starfandi sýningarrými tileinkað samtímaljósmyndun að Njálsgötu 49, 101 Reykjavík.
/sr.